A MIÑA FAMILIA É A MELLOR

 

Así comeza o poema que os nenos e nenas de segundo de primaria compuxeron e recitaron para as súas familias.

Sinxelo, directo e realmente fermoso. 

DIVERSIDADE FAMILIAR NAS ARTES

Preciosa actividade a levada a cabo en cuarto de primaria.

Investigaron e reflexionaron sobre como se representa á familia en distintas épocas a través de diversos cadros.

Manet, Sorolla, Sotomayor, Picasso...

Poucos membros, moitos, convivencia de varias xeracións no mesmo fogar e outros moitos aspectos foron tidos en conta na súa análise.

Gran traballo!!!

 

ACRÓSTICOS DE AMOR

O Día Internacional das Familias foi intenso en 4º de primaria.

Sandra, a titora, pediu aos nenos e nenas que completasen un acróstico da palabra familia con aqueles conceptos ou ideas que lles suxerise.

O resultado foi unha beleza. A familia inspíralles fogar, alegría, amor, comprensión...

E iso é algo marabilloso!!!

 

PUNTO LARANXA CONTRA O ACOSO ESCOLAR

Xa están operativos os dous Puntos Laranxas contra o acoso escolar: o físico, na entrada da biblioteca, e o virtual, na web do colexio.

A idea é ofrecer aos nenos e nenas unha ferramenta máis para evitar e previr o acoso. Afianzar un espazo no que poder deixar as súas inquietudes e preocupacións cando non son capaces de expresarse verbalmente ou queren facelo de forma anónima.

Para ilustrar o tema, lembramos a curtametraxe que presentamos o curso pasado, "Historias de Guláns", que trataba o tema desde o punto de vista dos nenos e nenas. Deixámosvos a ligazón por se tamén queredes lembralo.

https://blogdeleoleon.blogspot.com/2023/06/historias-de-gulans.html

 

DÍA INTERNACIONAL DAS FAMILIAS EN EDUCACIÓN INFANTIL

 

Os nenos e nenas de Educación Infantil celebraron o Día Internacional das Familias dunha maneira moi simbólica.

Debuxaron a cada membro familiar nunha bolsa de tea. Unhas familias aparecen no fogar, outras nun parque, outras flotan entre soles e arcos da vella... Tal e como eles e elas imaxínanas.

Non sería marabilloso poder levar á nosa familia sempre connosco nunha bolsiña de tea?

Fermosa idea a das nosas compañeiras de infantil!

Como todos os anos, queremos felicitar a todas as familias, pero especialmente ás da nosa comunidade educativa, piares fundamentais do Feliciano Barrera.

Moitas grazas por estar ahí para nós!!!

Felicidades, familias!!!

FAMILIAS NA ESCOLA: O PILOTO DE GAIVOTAS

 

En segundo de primaria volveron a recibir unha visita moi especial. O pai e a nai de Artai achegáronse á clase para contar un conto: Pedro, o piloto de gaivotas.

Pedro é un neno moi especial con intereses moi especiais. Quere explorar o mundo e todos os días sobe a lombos dunha gaivota para poder facelo á súa maneira. Pedro necesita axuda de cando en vez pero... quen non?

Manuel Darriba, o autor do libro, asinou un exemplar para nós e a familia de Artai tivo o detalle de regalárnolo.

Gardarémolo como ouro en pano. Así lembraremos cada día a nosa obriga cos pilotos de gaivotas, coas cazadoras de estrelas, cos psicólogos de elefantes ou coas cultivadoras de pedras: Comprender, acompañar e, por suposto, ensinar.

Mil grazas pola visita!!!

I EXPOSICIÓN DE ARTES NO FELICIANO BARRERA

 

Emocionados e emocionadas estamos de poder convidar a familias, veciños e veciñas á Primeira Exposición de Artes do Feliciano Barrera.

O mércores 15 de maio (Día Internacional das Familias), ás 13:00h, poderedes entrar no colexio para ver as obras de nenos e nenas de educación primaria. Tamén explicarán o proceso que seguiron para chegar a este fermoso produto final.

Cada aula inspirou as súas obras en artistas galegos e galegas cos que mantiveron distintas formas de contacto e que colaboraron connosco con todo o agarimo e a paciencia do mundo. Moitísimas grazas!!!

En 1º de primaria: Marta Cabaleiro.

2º: Menchu Lamas.

3º: Leandro Lamas.

4º: Urbano Lugrís.

5º: Elena Colmeiro.

6º:Silverio Rivas.

Non volo perdades! Esperámosvos!

FAMILIAS NA ESCOLA: HISTORIAS DE PAPEL

En segundo de primaria recibiron unha visita moi especial. A nai de Rosalía sorprendeu a nenos e nenas construíndo unha historia de papel.

Preguntarédesvos: Debuxando? Coloreando? Escribindo?...

Pois non. Construíron unha historia dobrando papel, coa técnica xa milenaria do origami.

Das súas mans e das dos pequenos e pequenas saíron cruces, xerséis, pantalóns, barcas, mesas, estrelas e ata unha caixa de bombóns!

Moitísimas grazas por vir!!!

Aproveitamos para lembrar que as familias sodes sempre benvidas no Feliciano Barrera. Só tedes que programar unha hora coa titora do voso fillo ou filla e regalarlles un día inesquecible. Animádevos!

 

A ESTRELA DA AMIZADE

Continuamos traballando a autoestima no noso Obradoiro de Habilidades Sociais e Emocionais. Nesta ocasión, a través das "estrelas".

A idea é sinxela: todos e todas somos estrelas en algo. Pode ser algo moi rechamante como o cine, ou a música... ou algo máis do día a día como ser amable, ou inventar xogos divertidos.

Representamos a cada neno e nena cunha estrela de cartolina na que, en cada punta, os seus compañeiros e compañeiras escriben unha calidade positiva.

En total: cinco inxeccións de autoestima para cando necesiten lembrar por que son estrelas!

 

A RULETA DA AUTOESTIMA

 

Como xa sabedes, de 2º a 6º de primaria levamos a cabo, desde principio de curso, o noso Obradoiro de Habilidades Sociais e Emocionais.

Estamos moi contentos e contentas coa experiencia.

Hoxe, no Círculo Seguro de 2º de primaria, fixemos un breve repaso das emocións básicas e xogamos a un novo xogo: A Ruleta da Autoestima.

É un recurso simple e poderoso: un protagonista, unha ruleta e que o azar decida como os nosos compañeiros e compañeiras farannos sentir mellor. Poden dicirnos as nosas mellores calidades, poden darnos unha aperta se nos apetece, poden facer con nós unha coreografía de mans, poden dedicarnos un aplauso...

O único malo da experiencia foi que quedaron con ganas de máis! Esperamos poder retomar o xogo o vindeiro mércores porque...

A quen lle ván mal quererse un pouquiño máis?

LUZ Y SOMBRA

 

"Luz y sombra"é o título do poema de Tere Acosta que recita para nós o alumnado de 4º de primaria.

E un texto moi fermoso que fala das dificultades para comunicarse e relacionarse que atopan, nos casos máis severos, algunhas persoas con autismo. Pero non só fala de dificultades; tamén fala de pontes, de tradutores, de mapas para entendernos... En fin, unha beleza de traballo!

Animámosvos a escoitalo. 

COMPRENDENDO O AUTISMO

Comezan a chegar os primeiros vídeopodcast de concienciación sobre o autismo.

Neste programa, os nenos e nenas de 3º de primaria responden a algunhas cuestións básicas como que é o autismo, cando aparece...

Fan unha bonita reflexión acerca de como todos e todas, con autismo e sen autismo, somos diferentes, tanto por dentro como por fóra. 

Falan das súas características físicas, dos seus gustos, do que se lles dá ben... Aproveita a oportunidade para coñecelos un pouco mellor!

 

OS ZAPATOS DE LUÍS

 

Esta semana conmemoramos o Día Mundial de Concienciación sobre o Autismo con variedade de actividades nas distintas aulas.

Comezamos vendo a curtametraxe "Os zapatos de Luís", unha fermosa historia na que un neno con autismo preséntase á súa nova clase.

Describe as súas pequenas teimas, o seu gusto pola orde e a estrutura, a súa literalidade...

Describe unha maneira distinta de percibir o mundo, unha maneira distinta... e marabillosa!!!

#contratos programa #cpinclue #incluet

MULLERES NA RADIO. 3º DE PRIMARIA

Seguimos na onda!

Despois da achega de educación infantil coa súa entrevista a Cristina Lasvignes, é a quenda de 3º de primaria.

escolleron a unha xornalista das de verdade. Unha muller que comezou a traballar na radio con só dezaoito anos. Directora e presentadora en Radio Nacional de España.

Necesitades máis pistas?

Gañou dous premios Ondas, dous Micrófonos de Prata e un Micrófono de Ouro... entre outros moitos galardóns.

Todo un exemplo de comunicación de calidade.

Xa sabedes quen é?

É Pepa Fernández!

#contratosprograma #cpinclue #igualat

 

MULLERES NA RADIO. EDUCACIÓN INFANTIL

Este curso a proposta de investigación do centro para o 8M, Día Internacional da Muller, era moi ampla e aberta: mulleres na radio, sen máis instrucións.

Iremos vendo como cada aula desenvolveu o proxecto á súa maneira. Hoxe contámosvos o precioso traballo de educación infantil:

Os nenos e nenas prepararon unha entrevista con Cristina Lasvignes, xornalista madrileña que traballou tanto en radio como en televisión. Seguro que a lembrades de "Hablar por hablar" na cadea SER ou de "Tal cual lo contamos", en Antena 3.

Cristina conectouse cos nenos e nenas por vídeoconferencia e respondeu con amabilidade e paciencia infinitas ás súas múltiples preguntas. Desde "por que che fixeches xornalista?" ata "Cal é a túa comida favorita?"

Un millón de grazas, Cristina, pola túa colaboración!

#contratosprograma #cpinclúe #igualat

 

O NOSO PROXECTO DE IGUALDADE EN PRENSA!

 

Este venres 8 de marzo, Treintayseis, un diario dixital da provincia de Pontevedra, publicou unha entrevista a Alba, a directora do noso colexio.

O tema, como non podería ser doutra maneira o 8 de marzo, era a igualdade. Alba explicou un pouco o que facemos no centro para fomentala e os resultados que observamos no alumnado. 

Deixo ligazón para que poidades lela. Non deixedes de facelo!

https://www.elespanol.com/treintayseis/articulos/cultura/fomentar-el-pensamiento-critico-y-la-reflexion-las-claves-de-los-docentes-gallegos-en-el-8m

#contratosprograma #cpinclúe #igualat

OBRADOIROS DE IGUALDADE

 

Non buscamos a igualdade o 8 de marzo, nin a semana do 8 de marzo, nin sequera o mes de marzo. Sempre buscamos a igualdade.

Onte e hoxe tivemos unha colaboración moi valiosa na nosa procura. Eugenia Urceira, nuns obradoiros organizados polo CIM (Centro de Información á Muller) de Ponteareas, falou ao alumnado de 3º, 4º, 5º e 6º de Primaria de temas moi importantes. Asertividade, empatía, intelixencia emocional, roles de xénero...

As achegas do alumnado sempre sorprenden cando se lles ofrece un espazo para expresarse.

Moitas grazas ao CIM e a Eugenia por unha experiencia tan positiva.

#contratos programa #cpinclúe #igualat

CANCIÓNS DE AMOR E AMIZADE NO FELICIANO BARRERA

 

Hoxe presentamos as cancións que namoran á familia do Feliciano Barrera.

Chegaron acompañadas de bonitas historias: a canción do primeiro baile de papá e mamá, a canción da voda dos avós, a canción que a cuadrilla escoitaba noite e día na adolescencia...

13 horas, 15 minutos e millóns de notas de amor e amizade que construímos entre todos e todas.

Moitas grazas pola colaboración e desculpas por aquelas cancións que non puidemos atopar. 

Fai click na ligazón e goza da música:

https://open.spotify.com/playlist/3phySXTN3kJAaagpbLhd5P?si=he-UWYPySUmq3yFBtXcRNw&pi=e-iR2XitA0SdCV

#contratosprograma #cpinclue#emocionat

EMOCIÓNS EN XOGO. NOVA EDICIÓN

 

No obradoiro de habilidades sociais e emocionais que levamos a cabo con todo o alumnado de segundo a sexto de primaria dedicamos o último mes aos xogos.

Cada vez atopamos unha oferta máis ampla de xogos que teñen que ver co recoñecemento e a expresión das emocións. Alegrámonos moito diso!

Este curso seleccionamos os seguintes:

EMOTRIP: Unha viaxe emocional a través de preguntas e divertidas representacións de teatro.

IKONIKUS: Pódense representar emocións complexas a través de debuxos sinxelos? Pois si, pódese.

A OCA DAS EMOCIÓNS: Unha oca tradicional cun enfoque distinto.

FUN FACTS: Xogo colaborativo, coñecernos entre nós puntúa.

FEELINKS: Sabes ponerte no lugar dos demais? Se o consegues, neste xogo seguro que arrasas.

Un mes de diversión e de intenso traballo ao mesmo tempo. 

#contratosprograma

#cpinclúe

#emocionat

EXPERIMENTOS EN EDUCACIÓN INFANTIL

 

O 11 de febreiro é o Día Internacional da Muller e da Nena na Ciencia e en 6º de Infantil aproveitaron a ocasión para lembrar uns conceptos moi sinxelos:

Os estudos de ciencias son unha opción para os nenos e os estudos de ciencias son unha opción para as nenas. Así de simple e así de complexo!

De momento, están encantados e encantadas cos seus experimentos e non nos estraña: Conseguiron recrear o mar e o arco da vella na clase!

Bo traballo, científicas e científicos!

#contratosprograma

#cpinclue

#igualat