BARREIRAS QUE DERRUBAR

Todos os anos, no mes de decembro, coincidindo co Día Internacional das Persoas con Discapacidade, desenvolvemos actividades de concienciación sobre as dificultades concretas que as persoas con discapacidade afrontan no seu día a día. 

Nesta ocasión, os nenos e nenas investigaron as barreiras arquitectónicas (evidentes e non tan evidentes) que temos no noso centro. Ademais, o alumnado de sexto de primaria expresou, por escrito, distintas peticións dirixidas á alcaldesa do noso concello. O primeiro paso para derrubar calquera tipo de barreira é ser consciente da súa existencia. Bo traballo!

#contratosprograma

#cpinclue

#incluet

25N RIMAS POLA IGUALDADE. A DRAGOA SIXTA

 

Presentamos hoxe o poema que traballaron en 3º de Primaria para a actividade "Rimas pola Igualdade", pola conmemoración do 25N.

A mensaxe principal que quixeron transmitir é que o deporte, en xeral, e o fútbol, en particular, non sabe nin de xénero nin de sexo.

Goza do fútbol se che gusta; sexas home, muller, dragón ou dragoa!

#contratosprograma

#cpinclue

#igualat

25N RIMAS POLA IGUALDADE. A PANTASMA ANTÓN

 

En cuarto de primaria aproveitaron a conmemoración do 25N para falar de igualdade, concretamente de igualdade á hora de encargarse das tarefas do fogar. Para iso recitaron, ilustraron e traduciron o poema "El fantasma Antonio", de Carmen Gil.

É importante dar ás tarefas domésticas o valor que teñen, sexas home, muller ou pantasma... que o castelo non se limpa só!

#contratosprograma

#cpinclue

#igualat

25N. RIMAS POLA IGUALDADE. E TI, SÓ TI

Este 25 de novembro, Día Internacional contra a violencia de xénero, o alumnado de sexto recitou "E ti, só ti" unha canción do grupo alicantino El Diluvi e a cantautora coruñesa Sés.

Nenas e nenos lembráronnos en verso a súa convicción de que, en materia de igualdade "sabes ben que mañá será mellor". Axudémoslles a que sexa unha realidade hoxe!

#contratosprograma

#cpinclue

#igualat

25N INFANTIL POLA IGUALDADE

 

Neste 25 de novembro, Día Internacional contra a violencia de xénero, en educación infantil non quixeron falar de violencia... e fixeron moi ben!

Falaron de igualdade, de amizade, de felicidade e de unidade entre todo tipo de persoas.

Se conseguimos afianzar estes valores nos máis pequenos e pequenas a violencia non terá espazo no que vivir.

#contratosprograma
#cpinclue
#igualat

DÍA DO TDAH EN ESPAÑA

Comezamos as actividades do Contrato Programa INCLÚE cunha nova conmemoración: 27 de outubro, día nacional para a concienciación sobre o TDAH.
Na modalidade Iguála-T esforzámonos por dar visibilidade a calquera situación ou condición que poida provocar diversidade funcional nas persoas. Nesta ocasión foi o TDAH (Trastorno por déficit de atención e hiperactividade) o protagonista das actividades. 
Os nenos e nenas viron a curtametraxe "Ti decides agora", no que unha nena conta as experiencias do seu irmán, que padece TDAH. A película non foi máis que unha escusa para a reflexión:
Algunha vez tivestes dificultades para concentrarvos? Imaxinádevos que vos ocorrese cada día.
Algunha vez esquecéstesvos de algo importante e enfadáronse convosco? Imaxinádevos que vos ocorrese cada día.
Algunha vez sentistes que o voso corpo móvese só e que non podedes facer nada para paralo? Imaxinádevos que vos ocorrese cada día
Despois de poñer en funcionamento a empatía, leva o momento da acción: Como podemos axudar aos nosos amigos e amigas con TDAH? Xurdiron unha chea de ideas: ter paciencia, lembrarlles o que teñen que facer, explicar moitas veces as normas dos xogos, non terlles sempre todo en conta...
En fin, un gran traballo de reflexión e de empatía. 
#contratosprograma
#cpinclue
#incluet

VISIBILIZACIÓN DO TEA

Hoxe é o último dia do mes de abril, mes que dedicamos no Feliciano Barrera á visibilización do amplo e complexo TEA (Trastorno do Espectro Autista) Este curso cada aula, ao seu ritmo e co nivel de complexidade adecuado, explorou a biografía de distintas personalidades con autismo e as súas importantes achegas á sociedade. Desde Mozart ata Greta Thungberg, pasando por Albert Einstein… O mundo das artes, das ciencias e, en xeral, calquera ámbito da actividade humana; viuse enriquecido en gran medida por persoas que se poden incluir dentro do espectro autista.

CONTRA O ACOSO ESCOLAR EU PODO…

Esta foi a proposta para o II Concurso de Carteis Inclusivos do CEIP Plurilingüe Feliciano Barrera. Os nenos e nenas demostraron, como sempre, que teñen grandes ideas para solucionar grandes problemas, como pode ser o acoso escolar. No vídeo podedes ver unha mostra dalgunhas delas.

En todas as clases, desde os 3 anos ata os 12, fixeron importantes reflexións. Agora é a nosa quenda, como profesorado do centro, de atendelas e contribuír a que a escola sexa unha contorna amable e segura para a totalidade do noso alumnado. Ollos sempre abertos!

Ao longo desta semana daremos a coñecer ás gañadoras e gañadores do concurso.

OBRADOIRO DE COEDUCACIÓN

Esta semana foi a última sesión do obradoiro de coeducación, destinado ao alumnado de 5º e 6º de Primaria. Nel tratáronse cuestións como os cambios físicos que están a vivir ou que vivirán en breve coa puberdade e o respecto polas diversas orientacións sexuais ou identidades de xénero. Tres intensas sesións nas que os protagonistas foron os nenos e nenas e os contidos estiveron enfocados nas súas dúbidas, inquietudes e opinións. Unha experiencia moi positiva.

DÍA DA FAMILIA 2023

Este ano celebramos este día convidando as familias de infantil a vir ao colexio para facer unha actividade cos nenos e nenas. Houbo moita variedade: música, contos, manualidades, unha sesión de relaxación, unha presentación de fotos e recordos... Sabemos que non é fácil para moitos de vós sacar tempo dos vosos traballos ou outras obrigacións para estar connosco, por iso agradecemos tanto as visitas. Se este ano non puido ser, non vos preocupedes, o centro sempre está aberto ás vosas suxerencias e haberá máis ocasións como esta. 

Día Mundial das Enfermidades Raras

O último día de febreiro, desde o ano 2008, está dedicado á visibilización das enfermidades raras. É certo que cada unha delas é moi pouco frecuente na poboación; pero resulta que hai tantas, que algúns estudos afirman que un 8% da poboación padece ou padecerá unha enfermidade rara. Con estas cifras, a que as enfermidades raras quizais non o sexan tanto? Diso trata este día, de crear conciencia e axudar ás persoas que padecen algunha destas enfermidades a que reciban o diagnóstico e tratamento necesario para conseguir a maior calidade de vida posible.

Nesta liña de pensamento as nais de Artai e Leia, de primeiro de primaria, ofrecéronse a ler un conto que trata o tema aos nenos e nenas da súa clase, porque nunca é pronto para visibilizar e concienciar. Moitas grazas ás dúas por ensinarnos tanto!

Reporteiras na historia

 Reporteiras na historia é unha tarefa de investigación. Nela, as distintas aulas buscaban información sobre algunhas das primeiras reporteiras da Idade Contemporánea e os problemas aos que se enfrontaban na súa profesión polo feito de ser mulleres. En cuarto de primaria ampliaron a investigación e estudaron a "Las Sinsombrero", grupo de marabillosas pensadoras e artistas que pertenceron á xeración do 27 e cuxo traballo foi subestimado durante anos. 

A todas e todos: Parabéns por un gran traballo!!!

Contacontos pola Igualdade

Este 8M os nenos e nenas de sexto de Educación Primaria preparáronnos unha actividade moi especial.  En parellas ou tríos foron a todas as aulas de primaria e de infantil do colexio para contar un conto con temática centrada na igualdade. Fixérono realmente ben. Todas e todos gozamos moito coas súas historias. Grazas!

Emocións en Xogo

Febreiro é un mes de emocións fortes no Feliciano Barrera. Dentro do noso programa de desenvolvemento da competencia emocional incluímos unhas xornadas de xogos que teñen que ver con habilidades sociais ou xestión emocional. Cada aula ten un ou dous xogos que, pasadas dúas semanas intercambiarán con outra.  Unha maneira amable e lúdica de aprender a recoñecer e xestionar as nosas emocións. 

Día Internacional da Felicidade

Como xa sabedes, polo Día Internacional da Felicidade, decidimos preparar unha lista de reprodución coas cancións que alumnado, profesorado e familias considerades as máis alegres do mundo

Por problemas técnicos non puidemos entrar o luns coa selección de cancións . Hoxe si! Xa está preparada a nosa lista de reprodución coas “cancións máis alegres do mundo” ou, polo menos, as que ao noso alumnado, profesorado e familias parecéronllo. Deixámosvos a ligazón para poder abrir directamente en Spotify e gozar de cinco horas de diversidade musical. A lista chámase CEIP Plurilingüe FELICIANO BARRERA.

https://spotify.link/h0CI111Rnyb

Xarope de autoestima

Todos e todas necesitamos de cando en vez sacar o foco dos nosos defectos (que é o que adoitamos facer) e dar luz a aquilo que facemos ben e que nos fai felices. En cuarto de primaria fixeron ese exercicio cun marabilloso resultado: descubriron que son nenos e nenas che@s de calidades positivas. Imos ter que ampliar a clase para facer sitio a tanto talento. Parabéns!

Xornadas de Habilidades Sociais

Os nenos e nenas de 5º e 6º de Primaria puideron gozar de 3 xornadas de Habilidades Sociais da man dunha experta no tema. Foron tres días de emocións intensas e de reflexión acerca de temas tan importantes como o autoconcepto, a autoestima, os distintos tipos de comunicación, a resolución de conflitos... Todo iso tratado de forma moi amena, empregando, por exemplo, o  xogo de roles ou o visionado de curtametraxes representativas. Estamos convencidos e convencidas de que veremos resultados de todas estas aprendizaxes en breve. 

MULLER E CIENCIA

Onte, sábado 11 de febreiro, foi o Día Internacional da Muller e a Nena na Ciencia. Por iso onte, no colexio, as nenas e nenos de 5º e 6º de Primaria recibiron unha visita moi especial. Mª Ángeles Pena Gallego, especialista en Química Cuántica, explicounos como, aínda que sempre houbo mulleres científicas, no pasado o seu traballo era ninguneado e mesmo roubado por unha contorna completamente masculinizada.

Hai moitas cousas que poden condicionar a vocación académica das persoas, non debemos permitir que a identidade de xénero sexa unha delas. Queremos homes e mulleres en todas as ramas do saber e do traballo!

A paz desde dentro.

Este curso aproveitamos a celebración do Día Escolar da Non Violencia e a Paz para afondar no noso mundo emocional e completar así una das actividades programadas no proxecto Emocióna-T. 

Este 30 de xaneiro o noso programa de actividades comezou dunha maneira diferente á habitual. Expuxemos a paz como algo que comeza dentro de nós e que achegamos aos demais. A través do ioga, todas as nenas e nenos de infantil e primaria tentarán ver cara o seu interior para atopar a paz e a calma que tanta falta fai nestes tempos. 

Hoxe 3º e 4º de Primaria inauguraron as xornadas, mañá será a quenda de 1º... O próximo día 7 de febreiro todo o CEIP Plurilingüe Feliciano Barrera terá saudado ao sol.

NAMASTE!!!

Hoy voy a hablarte de mis héroes...

Coñecedes a canción? Xa que falamos de heroes e heroínas: Este curso, para conmemorar o día da discapacidade, os nenos e nenas do CEIP Plurilingüe Feliciano Barrera cantaron en linguaxe de signos a canción "De ellos aprendí", de David Rees. 

Tentaron seguir a canción facendo os signos correctamente, pero resultoulles bastante complicado. Non ten importancia! A aprendizaxe que buscabamos consistía en que comprendesen e experimentasen que as persoas xordas poden cantar e que, de feito, cantan. 

Esperamos non ter feito ningún signo inapropiado na nosa práctica!

 

Póñome no teu lugar.

Para a conmemoración do Día da Discapacidade, ademais das actividades xa programadas, chegounos uha preciosa proposta dunha familia do centro e, como non, subímonos ao carro. 

Trátase do reto "Póñome no teu lugar", que nos propón pasar unha xornada ou actividade con algunha "limitación". En primeiro de primaria, taparon os seus ollos para percibir sen ver e empatizar, na medida do posible, co que pode sentir unha persoa cega. Diversión para algúns e algunhas; medo para outr@s; unha experiencia, iso si, para todos e todas. 

Falamos coas mans

Este curso centramos as actividades do Día da Discapacidade na discapacidade auditiva e na linguaxe de signos. 

Tentamos facer comprender aos nenos e nenas a importancia da comunicación e o valioso que resulta ter ferramentas para poder comunicarnos con todo tipo de persoas. 

Os maiores e as maiores do cole conseguiron deletrear o seu nome completo en linguaxe de signos e aprender algunhas fórmulas de cortesía básicas, como saúdos e despedidas. O alumnado de educación infantil conseguiu aprender o xesto correspondente coa primeira letra do seu nome. Todos e todas poden participar se a actividade prográmase atendendo ás múltiples idades, niveis de desenvolvemento e intereses do alumnado. 

DisCamino de Santiago

Onte os nenos e nenas de 5º e 6º de Primaria asistiron a uha charla moi especial e emocionante na Avisoureira. Os relatores eran persoas con diversidade funcional que fixeron o camiño de Santiago grazas a DisCamino deSantiago, un proxecto que nace en 2009 con principal obxectivo de facer o camiño de Santiago accesible para todas as persoas, incluídas, por suposto, aquelas que presentan algunha discapacidade. Convidámosvos a visitar a súa web, discamino.org e emocionarvos coas experiencias de superación e de inclusión que alí se contan. 

Grazas ás persoas que onte, coas súas palabras, fixeron que o noso alumnado reflexionase sobre a enorme cantidade de cousas que poden facer e que fan as persoas con discapacidade no seu día a día. Foron un gran exemplo para todas as nenas e todos os nenos.

Esta actividade, organizada polo Departamento de Orientación, é a primeira dunha serie que comeza a semana que vén en conmemoración do 3 de decembro, Día Internacional das Persoas con Discapacidade.

Seguirémosvos contando!

Quérome e quero ben

Moi interesante o traballo que as nenas e nenos de sexto de primaria expuxeron para o 25N, Día Internacional da Eliminación da Violencia Contra a Muller.

Centráronse no concepto do amor e identificaron algunhas condutas que se poden confundir co amor, pero non o son: control, falta de privacidade, celos...

Non importa se es unha nena ou un neno, se observas algunha destas condutas nas túas primeiras relacións, escoita ben ao teu instinto: iso non é amor. 

25N Todas e todas contra a violencia de xénero

Como cada curso, aproveitamos o Día Internacional Contra a Violencia de Xénero para falar cos nosos nenos e nenas da importancia da igualdade entre homes e mulleres. O noso centro sempre se posicionou e posicionarase en contra de todas e cada unha das distintas manifestacións da violencia; por suposto, tamén contra a violencia de xénero. 

Este curso as actividades programadas foron un pouco distintas. Non quixemos poñer o acento na violencia para deixar espazo a outros conceptos máis positivos. Falamos de igualdade, falamos de respecto, falamos de amor, falamos de como debemos tratar ás demais persoas... Se aplicamos estes conceptos e servimos de modelo a nenos e nenas, a violencia terá cada vez menos espazo para subsistir. Tanto en casa como na escola, aproveitemos nosa ferramenta máis poderosa: A educación!!!