A paz desde dentro.

Este curso aproveitamos a celebración do Día Escolar da Non Violencia e a Paz para afondar no noso mundo emocional e completar así una das actividades programadas no proxecto Emocióna-T. 

Este 30 de xaneiro o noso programa de actividades comezou dunha maneira diferente á habitual. Expuxemos a paz como algo que comeza dentro de nós e que achegamos aos demais. A través do ioga, todas as nenas e nenos de infantil e primaria tentarán ver cara o seu interior para atopar a paz e a calma que tanta falta fai nestes tempos. 

Hoxe 3º e 4º de Primaria inauguraron as xornadas, mañá será a quenda de 1º... O próximo día 7 de febreiro todo o CEIP Plurilingüe Feliciano Barrera terá saudado ao sol.

NAMASTE!!!

Hoy voy a hablarte de mis héroes...

Coñecedes a canción? Xa que falamos de heroes e heroínas: Este curso, para conmemorar o día da discapacidade, os nenos e nenas do CEIP Plurilingüe Feliciano Barrera cantaron en linguaxe de signos a canción "De ellos aprendí", de David Rees. 

Tentaron seguir a canción facendo os signos correctamente, pero resultoulles bastante complicado. Non ten importancia! A aprendizaxe que buscabamos consistía en que comprendesen e experimentasen que as persoas xordas poden cantar e que, de feito, cantan. 

Esperamos non ter feito ningún signo inapropiado na nosa práctica!

 

Póñome no teu lugar.

Para a conmemoración do Día da Discapacidade, ademais das actividades xa programadas, chegounos uha preciosa proposta dunha familia do centro e, como non, subímonos ao carro. 

Trátase do reto "Póñome no teu lugar", que nos propón pasar unha xornada ou actividade con algunha "limitación". En primeiro de primaria, taparon os seus ollos para percibir sen ver e empatizar, na medida do posible, co que pode sentir unha persoa cega. Diversión para algúns e algunhas; medo para outr@s; unha experiencia, iso si, para todos e todas. 

Falamos coas mans

Este curso centramos as actividades do Día da Discapacidade na discapacidade auditiva e na linguaxe de signos. 

Tentamos facer comprender aos nenos e nenas a importancia da comunicación e o valioso que resulta ter ferramentas para poder comunicarnos con todo tipo de persoas. 

Os maiores e as maiores do cole conseguiron deletrear o seu nome completo en linguaxe de signos e aprender algunhas fórmulas de cortesía básicas, como saúdos e despedidas. O alumnado de educación infantil conseguiu aprender o xesto correspondente coa primeira letra do seu nome. Todos e todas poden participar se a actividade prográmase atendendo ás múltiples idades, niveis de desenvolvemento e intereses do alumnado. 

DisCamino de Santiago

Onte os nenos e nenas de 5º e 6º de Primaria asistiron a uha charla moi especial e emocionante na Avisoureira. Os relatores eran persoas con diversidade funcional que fixeron o camiño de Santiago grazas a DisCamino deSantiago, un proxecto que nace en 2009 con principal obxectivo de facer o camiño de Santiago accesible para todas as persoas, incluídas, por suposto, aquelas que presentan algunha discapacidade. Convidámosvos a visitar a súa web, discamino.org e emocionarvos coas experiencias de superación e de inclusión que alí se contan. 

Grazas ás persoas que onte, coas súas palabras, fixeron que o noso alumnado reflexionase sobre a enorme cantidade de cousas que poden facer e que fan as persoas con discapacidade no seu día a día. Foron un gran exemplo para todas as nenas e todos os nenos.

Esta actividade, organizada polo Departamento de Orientación, é a primeira dunha serie que comeza a semana que vén en conmemoración do 3 de decembro, Día Internacional das Persoas con Discapacidade.

Seguirémosvos contando!

Quérome e quero ben

Moi interesante o traballo que as nenas e nenos de sexto de primaria expuxeron para o 25N, Día Internacional da Eliminación da Violencia Contra a Muller.

Centráronse no concepto do amor e identificaron algunhas condutas que se poden confundir co amor, pero non o son: control, falta de privacidade, celos...

Non importa se es unha nena ou un neno, se observas algunha destas condutas nas túas primeiras relacións, escoita ben ao teu instinto: iso non é amor. 

25N Todas e todas contra a violencia de xénero

Como cada curso, aproveitamos o Día Internacional Contra a Violencia de Xénero para falar cos nosos nenos e nenas da importancia da igualdade entre homes e mulleres. O noso centro sempre se posicionou e posicionarase en contra de todas e cada unha das distintas manifestacións da violencia; por suposto, tamén contra a violencia de xénero. 

Este curso as actividades programadas foron un pouco distintas. Non quixemos poñer o acento na violencia para deixar espazo a outros conceptos máis positivos. Falamos de igualdade, falamos de respecto, falamos de amor, falamos de como debemos tratar ás demais persoas... Se aplicamos estes conceptos e servimos de modelo a nenos e nenas, a violencia terá cada vez menos espazo para subsistir. Tanto en casa como na escola, aproveitemos nosa ferramenta máis poderosa: A educación!!!

Pleno Municipal no Concello de Ponteareas

O 21 de novembro o colexio participou, como cada ano, no Pleno Infantil do Concello de Ponteareas, presidido pola nosa Alcaldesa.

Lucía e Amélia, de 6º e 5º de Primaria respectivamente, foron as encargadas de representarnos e fixérono realmente ben. Estamos moi orgullosos e orgullosas de ver como superaron os nervios e os medos que, inevitablemente, calquera tería na súa situación e, ademais, gozar da experiencia. Nós, dende o cole, seguimos o Pleno en rigoroso directo.

O tema tratado este ano non podería ser máis adecuado. Os nosos nenos e nenas necesitan que se fale da súa saúde mental e que se dea resposta rápida e eficaz ás súas inquietudes.

Agradecemos ao Concello de Ponteareas que dea voz aos nosos nenos e nenas e, por suposto, tamén ás familias, que os animan a participar. 

10 de outubro: Día Mundial da Saúde Mental.

Este é o primeiro curso que programamos no colexio actividades para traballar o concepto de saúde mental, pois pensamos que nunca foi tan necesario como agora. Para a OMS, resumindo moito, unha persoa que goza dunha boa saúde mental é aquela que se atopa nun estado de benestar no que pode desenvolver o seu potencial; afrontar as tensións normais da vida; traballar ou estudar e achegar algo á súa familia ou comunidade. A partires desta definición, pedimos aos nenos e nenas que nos contasen que ferramentas ou estratexias axúdanlles a sentirse ben. Pensamos que a tarefa quizais sería complicada para os máis pequenos e pequenas pero, unha vez máis, demostráronnos que non debemos subestimar as súas capacidades. Nas imaxes podedes ver os murais que fixeron os nenos e nenas do centro coas súas recomendacións para sentirse ben: "escoitar música, respirar, pasear pola natureza, ler, falar con alguén de confianza..." É sorprendente a intuición que teñen para todo o que é importante. Tamén chamounos moito a atención como a maioría dos nenos e nenas recomendan axudar aos demais como estratexia para sentirnos mellor eles e elas. Mergullando pola rede, atopamos as recomendacións de prestixiosas institucións sanitarias para mellorar a nosa saúde mental. Todas elas coinciden nos seguintes puntos: 

 1. Facer exercicio de maneira regular, se é posible, ao aire libre. 

 2. Levar unha dieta saudable e equilibrada. 

 3. Coidar a cantidade e calidade do soño. 

 4. Permitirnos sentir todas as emocións, non reprimilas. 

 5. Establecer metas e obxectivos a curto, medio e longo prazo. 

 6. Reservar momentos para dedicar a nós mesmos e mesmas. 

 7. Relacionarnos con máis persoas.

 8. Pedir axuda cando a necesitamos. 

Como podemos ver claramente, os nosos nenos e nenas coñecen o camiño cara a unha boa saúde mental na teoría. Agora será labor das familias e da escola botarlles unha man coa práctica.